فقیہ ابوللیث رحمۃ اللہ علیہ سے منقول ہے کہ آنحضرت ﷺ عیدالاضحی میں دو جانور قربانی کرکے فرمایا کرتے تھے اے اللہ ان میں سے ایک جانور اپنی طرف سے اور دوسرا اپنی امت کی طرف سے قربانی کرتا ہوں۔ پس جو شخص آنحضرت ؍ﷺ کی طرف سے قربانی کرے گا وہ بے شمار ثواب پائے گا۔ (تذکرہ الواعظین)۔ سال کی عبادت کا ثواب: جس پر قربانی واجب ہو اس کیلئے مستحب ہے کہ نماز عید سے فارغ ہوکر قربانی کرے اور قربانی کا گوشت کھائے اور تمام گوشت کے تین حصے کرکے ایک حصہ اپنے گھر میں صرف کرے جو شخص خالص نیت سے قربانی کرے گا وہ تمام گناہوں سے پاک صاف ہوجائے گا اور سال بھر تک اللہ تعالیٰ اس کے رزق میں برکت دے گا۔ اس کو کسی کا محتاج نہ کرے گا پھر قیامت کے دن وہی قربانی کا جانور اس کے سامنے پیش کیا جائے گا جس پر سوار ہوکر پل صراط سے دوڑتی ہوئی بجلی کی طرح گزر کر داخل بہشت ہوگا۔ (انیس الواعظین) پل صراط پر سواری: آنحضرت ﷺ نے فرمایا: اے مسلمانو! قربانی کے جانوروں کو کھلا پلا کر خوب موٹا کیا کرو کیونکہ یہ جانور قیامت کے دن پل صراط پر سواری کاکام دیں گے۔ عیدالاضحیٰ کے دن اللہ کے نزدیک خون کے قطرے زمین پر گرانے سے بڑھ کر کوئی عمل نہیں۔ قربانی کے خون کا پہلا قطرہ جو زمین پر گرتا ہے وہ قربانی کرنے والے کے تمام گناہوں کا کفارہ ہوتا ہے۔ ایک سال کی عبادت کا ثواب: حضرت ابو موسیٰ اشعری رضی اللہ عنہٗ روایت کرتے ہیں کہ حضور نبی اکرم ﷺ نے ارشاد فرمایا: جس نے اپنے آپ کو قربانی کے دن کھانے پینے‘ جماع سے روکا اس وقت تک کہ عید کی نماز پڑھ لی جائے تو گویا اس نے تمام سال اللہ کی عبادت کی۔ (انیس الواعظین)۔ رزق میں برکت: حضرت جلال الدین سیوطی رحمۃ اللہ علیہ سے مروی ہے کہ جس گھر میں کوئی جانور قربان نہیں کیا جاتا حالانکہ گھر والا تنگ دست نہیں پس وہ گھر شکایت کرتا ہے اور ان گھر والوں کے لیے بددعا کرتا ہے اور کہتا ہے کہ جس طرح تم نے مجھے قربانی کی دولت سے محروم رکھا اللہ تم کو بھی خیرو برکت سے بے نصیب کرے اور جس گھر میں قربانی کی جاتی ہے وہ دعائے نیک کرتا ہے کہ جس طرح تم نے مجھے برکات سے مالامال کیا تم کو بھی اللہ تعالیٰ اپنے احسان سے شاد کام کرے اس گھر میں سال بھر تک رزق کی برکت ہوگی اور قربانی کرنے والا حفظ الٰہی میں رہےگا۔ (تذکرہ الواعظین)۔

(بحوالہ: عبقری پبلی کیشنزکی شہرہ آفاق کتاب حرمین میں نیکیوں کے پہاڑ)